ഹരിപ്പാട്: ദമ്പതികൾ സഞ്ചരിച്ച സ്‌കൂട്ടറിൽ കാറിടിച്ച് ഭർത്താവ് മരിച്ചു
കായംകുളം പുള്ളിക്കണക്ക് കന്നിമേൽ ചന്ദ്രബാബു ( വാവാച്ചി 52) ആണ് മരിച്ചത്. ഗുരുതരമായി പരിക്കേറ്റ ഭാര്യ രജനിയെ ( മിനി) വണ്ടാനം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ദേശീയപാതയിൽ താമല്ലാക്കൽ ജംഗ്ഷന് സമീപം ഞായറാഴ്ച വൈകിട്ട് 4. 30 ന് ആയിരുന്നു അപകടം. വൈക്കത്ത് നിന്നും കൊല്ലത്തേക്ക് പോയ കാർ അമിതവേഗതയിൽ മറ്റൊരു വാഹനത്തെ മറികടക്കുന്നതിനിടയിൽ ഹരിപ്പാട് നിന്ന് കരുവാറ്റയിലേക്ക് പോവുകയായിരുന്ന ദമ്പതികൾ സഞ്ചരിച്ചിരുന്ന സ്‌കൂട്ടറിൽ ഇടിക്കുകയായിരുന്നു. ഗുരുതരമായി പരിക്കേറ്റ ഇരുവരെയും ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ചന്ദ്രബാബുവിന്റെ ജീവൻ രക്ഷിക്കാനായില്ല. 25ന് ഇവർ പുതുതായി പണികഴിപ്പിച്ച വീടിന്റെ വാസ്തുബലി ബന്ധുക്കളെയും സുഹൃത്തുക്കളെയും ക്ഷണിക്കുന്നതിനായി പോകുന്ന വഴിയാണ് അപകടം ഉണ്ടായത്. ടൈൽ പണിക്കാരൻ ആണ് ചന്ദ്രബാബു. മക്കൾ: അരുൺ ബാബു, അഖിൽ ബാബു.
