വിസി പുനർനിയമനത്തിൽ മുഖ്യമന്ത്രി നേരിട്ട് ഇടപെട്ടു; മൂന്നു കത്തുകൾ പുറത്തുവിട്ട് ഗവർണർ;
വിവാദ ബില്ലുകളിൽ ഒപ്പിടില്ലെന്നും ഗവർണർ

തിരുവനന്തപുരം: കണ്ണൂർ സർവകലാശാലയിലെ വൈസ് ചാൻസലറുടെ പുനർനിയമനത്തിൽ മുഖ്യമന്ത്രി പിണറായി വിജയൻ ഇടപെട്ടുവെന്ന് ഗവർണർ ആരിഫ് മുഹമ്മദ് ഖാൻ. പുനർനിയമനം ആവശ്യപ്പെട്ട് മുഖ്യമന്ത്രി നേരിട്ട് രാജ്ഭവനിലെത്തി സമ്മർദം ചെലുത്തി. വെയിറ്റേജ് നൽകാമെന്ന് താൻ പറഞ്ഞു. നിർബന്ധിച്ചതോടെയാണ് മുഖ്യമന്ത്രിയുടെ വാക്കിന് വില നൽകിയത്. മുഖ്യമന്ത്രിയുമായി കത്തിലൂടെ നടത്തിയ ആശയവിനിമയത്തിന്റെ പകർപ്പുകളടക്കം ഗവർണർ വാർത്താസമ്മേളനത്തിൽ പുറത്തുവിട്ടു.

വിസി പുനർനിയമനം ആവശ്യപ്പെട്ട് 2021 ഡിസംബർ എട്ടിന് മുഖ്യമന്ത്രി ആദ്യകത്ത് അയച്ചെന്നാണ് ഗവർണർ വ്യക്തമാക്കിയത്. തന്റെ നാട്ടുകാരനാണ് കണ്ണൂർ വിസിയെന്നും, നിയമനത്തിന്റെ നടപടി ക്രമങ്ങൾ ഒഴിവാക്കണമെന്നും മുഖ്യമന്ത്രി ആവശ്യപ്പെട്ടു. നിയമനം നിയമവിധേയമല്ലെന്ന് താൻ നിരവധി തവണ ചൂണ്ടിക്കാട്ടി. അപ്പോൾ നടപടിക്രമങ്ങൾ പാലിക്കുമെന്ന് ഉറപ്പുനൽകുകയും ചെയ്തു. താൻ ആവശ്യപ്പെടാതെ തന്നെ സർക്കാർ അഡ്വക്കേറ്റ് ജനറലിന്റേത് ഉൾപ്പെടെയുള്ള നിയമോപദേശം തനിക്ക് വാങ്ങി നൽകി. ഇത് സമ്മർദ്ദ തന്ത്രമായിരുന്നുവെന്നും ഗവർണർ പറഞ്ഞു.

സമ്മർദം ശക്തയതോടെ ചാൻസലർ സ്ഥാനത്ത് തുടരാനില്ലെന്ന് ചൂണ്ടിക്കാട്ടി മുഖ്യമന്ത്രിക്ക് കത്തയച്ചു. ഇതിന് മറുപടിയായി ചാൻസലർ സ്ഥാനത്ത് തുടരണമെന്ന് ആവശ്യപ്പെട്ട് മുഖ്യമന്ത്രിയുടെ രണ്ടാമത്തെ കത്ത് ഡിസംബർ 16 ന് ലഭിച്ചു. സർവ്വകലാശാല ഭരണത്തിൽ ഇടപെടില്ലെന്ന് വ്യക്തമാക്കി ജനുവരി 16 ന് മൂന്നാമത്തെ കത്തും ലഭിച്ചെന്ന് ഗവർണർ പറഞ്ഞു. മുഖ്യമന്ത്രി തനിക്ക് നൽകിയ ഉറപ്പു മറന്നുപോയോ എന്നും ആരിഫ് മുഹമ്മദ് ഖാൻ ചോദിച്ചു.

വാർത്താസമ്മേളനത്തിന് മുമ്പ് ചീഫ് സെക്രട്ടറി വിപി ജോയി തന്നെ കണ്ടത് സ്വകാര്യ സന്ദർശനമാണ്. മകളുടെ കല്യാണത്തിന് ക്ഷണിക്കാനാണ് ചീഫ് സെക്രട്ടറിയെത്തിയത്. ആർഎസ്എസ് മേധാവി മോഹൻ ഭാഗവതുമായി നടത്തിയത് സ്വകാര്യ കൂടിക്കാഴ്ചയാണ്. 1986 മുതൽ ആർഎസ്എസുമായി ബന്ധമുണ്ട്. ആർഎസ്എസ് നിരോധിത സംഘടനയാണോ എന്നും ഗവർണർ ചോദിച്ചു. വിവാദമായ രണ്ടു ബില്ലുകളിൽ ഒപ്പിടില്ലെന്നും ഗവർണർ സൂചിപ്പിച്ചു.