എം ബി രാജേഷ് മന്ത്രി സ്ഥാനത്തേയ്ക്ക്; സ്പീക്കറായി എ എൻ ഷംസീർ
തിരുവനന്തപുരം: സിപിഎം സംസ്ഥാന സെക്രട്ടറിയായി തിരഞ്ഞെടുക്കപ്പെട്ടതിനെ തുടർന്ന് മന്ത്രിസ്ഥാനം രാജിവച്ച എം വി ഗോവിന്ദന് പകരക്കാരനായി സ്പീക്കർ എം ബി രാജേഷ് എത്തുന്നു. എം ബി രാജേഷിന് പകരം സ്പീക്കറായി വരുന്നത് തലശേരി എംഎൽഎ എ എൻ ഷംസീർ. സജി ചെറിയാൻ രാജിവച്ച സ്ഥാനത്ത് തൽക്കാലം മന്ത്രി ഉണ്ടാകില്ല. എകെജി സെന്ററിൽ ചേർന്ന സംസ്ഥാന സെക്രട്ടേറിയറ്റ് യോഗമാണ് തീരുമാനമെടുത്തത്.
തദ്ദേശം, എക്‌സൈസ് എന്നീ പ്രധാനപ്പെട്ട വകുപ്പുകളാണ് എം വി ഗോവിന്ദൻ കൈകാര്യം ചെയ്തിരുന്നത് അതിനാൽ എം ബി രാജേഷ് പകരക്കാരനാകുന്നതാണ് ഉചിതമെന്ന് യോഗത്തിൽ ഭൂരിപക്ഷ അഭിപ്രായമുണ്ടായി. കണ്ണൂരിന് ഒരു മന്ത്രിയെ നഷ്ടപ്പെടുന്നതിനാൽ സ്പീക്കർ പദവിയിലേയ്ക്ക് കണ്ണൂരിൽ നിന്നുള്ള ജനപ്രതിനിധി എത്തുകയായിരുന്നു.
പ്രധാനമന്ത്രിയുടെ സന്ദർശനവുമായി ബന്ധപ്പെട്ട് മുഖ്യമന്ത്രി പിണറായി വിജയൻ രാവിലെ കൊച്ചിയിലായതിനാലാണ് സെക്രട്ടേറിയറ്റ് യോഗം ഉച്ചയ്ക്കുശേഷമാക്കിയത്.
