മഴക്കെടുതി മൂലം നഷ്ടം സംഭവിച്ച വ്യാപാരികൾക്ക് നഷ്ടപരിഹാരം നൽകണം
അസോസിയേഷൻ അംഗങ്ങളുടെ പരാതികൾ സംഘടന വഴി അധികാരികളിൽ എത്തിച്ച് പരിഹരിക്കും: എ.കെ.സി.ജി.ഡി.എ.
കോഴിക്കോട്. എ.കെ.സി.ജി.ഡി.എ. അംഗങ്ങളായ വ്യാപാരി-വ്യവസായികൾ നേരിടുന്ന പ്രശ്‌നങ്ങളും നിർദ്ദേശങ്ങളും സംബന്ധിച്ച് അസോസിയേഷൻ ഭാരവാഹികളായ ഷെവലിയാർ സി. ഇ. ചാക്കുണ്ണി, അഡ്വക്കേറ്റ് എം കെ അയ്യപ്പൻ, സിറാജുദ്ദീൻ എള്ളാത്തൊടി എന്നിവർ കഴിഞ്ഞ ദിവസങ്ങളിൽ മുഖ്യമന്ത്രി, ധനകാര്യ മന്ത്രി, വ്യവസായ മന്ത്രി, പൊതുമരാമത്ത് മന്ത്രി, ബന്ധപ്പെട്ട വകുപ്പ് മേധാവികൾ എന്നിവർക്ക് നിവേദനം സമർപ്പിച്ച് ചർച്ച നടത്തിയിരുന്നു. അനുകൂലമായ നിലപാടുകളും, നടപടികളും സ്വീകരിച്ചു വരുന്നതായി ബന്ധപ്പെട്ടവരിൽ നിന്നും രേഖാ മൂലം മറുപടികൾ ലഭിച്ചു വരുന്നു.
കാലതാമസമില്ലാതെ സർക്കാർ പ്രശ്‌നങ്ങൾ ഓരോന്നായി പരിഹരിക്കുന്നതിന് നടപടികൾ സ്വീകരിക്കുന്ന സാഹചര്യത്തിൽ തുടർന്നും അംഗങ്ങളുടെ പരാതികൾ അസോസിയേഷൻ മുഖാന്തരം ബന്ധപ്പെട്ടവരിൽ സമർപ്പിച്ച് പരിഹാരം കാണാൻ അസോസിയേഷൻ അടിയന്തര യോഗം ഐക്യകണ്‌ഠേന തീരുമാനിച്ചു.
കഴിഞ്ഞദിവസം തലശ്ശേരി ഫർണിച്ചർ കട ഉടമ നഗരസഭയിൽ നിന്നും നേരിട്ട പ്രശ്‌നം ഒറ്റപ്പെട്ട സംഭവമല്ലെന്നും സമാന സംഭവങ്ങൾ മറ്റു പല സ്ഥാപനങ്ങളും നേരിടുന്നുണ്ട് എന്നത് വസ്തുതയാണ്. പലതും അതാത് നഗരസഭ അധ്യക്ഷൻമാരും മറ്റും യഥാസമയം ഇടപെട്ട് പരിഹരിക്കാറുണ്ട്. എങ്കിലും അവശേഷിക്കുന്ന ചില പ്രശ്‌നങ്ങൾ അടുത്ത ദിവസം മുഖ്യമന്ത്രിയുടെയും, വ്യവസായ മന്ത്രിയുടെയും, ധനകാര്യ മന്ത്രിയുടെയും ശ്രദ്ധയിൽപ്പെടുത്താൻ അസോസിയേഷൻ പ്രസിഡണ്ടിനെയും ജനറൽ സെക്രട്ടറിയും യോഗം ചുമതലപ്പെടുത്തി.
വ്യാപാരികൾ ഓണം സീസൺ പ്രമാണിച്ച് വളരെയധികം ചരക്കുകൾ സ്റ്റോക്ക് ചെയ്ത വേളയിൽ പ്രധാനപ്പെട്ട വാണിജ്യ കേന്ദ്രങ്ങളിൽ ഉൾപ്പെടെ ഉണ്ടായ വെള്ളപ്പൊക്കം മൂലം നാശനഷ്ടം സംഭവിച്ച വ്യാപാരികൾക്ക് അർഹമായ നഷ്ടപരിഹാരം കേന്ദ്രത്തിന്റെയും സാമ്പത്തിക സഹായത്തോടെ നൽകാൻ കേരള സർക്കാർ നടപടികൾ സ്വീകരിക്കണമെന്ന് യോഗം അഭ്യർത്ഥിച്ചു.
കോഴിക്കോട് അസോസിയേഷൻ ഓഫീസിൽ ചേർന്ന യോഗത്തിൽ പ്രസിഡന്റ് ഷെവലിയാർ സി.ഇ. ചാക്കുണ്ണി അധ്യക്ഷത വഹിച്ചു. ആഗസ്റ്റ് 11,27 തീയതികളിൽ തിരുവനന്തപുരത്ത് പോയി മന്ത്രിമാരെയും മറ്റു കണ്ട് നിവേദനം സമർപ്പിച്ചത് ഉൾപ്പെടെയുള്ള കാര്യങ്ങൾ അധ്യക്ഷ പ്രസംഗത്തിൽ വിശദീകരിച്ചു. നിയമോപദേഷ്ടാവ് അഡ്വക്കേറ്റ് എം.കെ. അയ്യപ്പൻ, സെക്രട്ടറിമാരായ ടി.പി. വാസു, കുന്നോത്ത് അബൂബക്കർ, ജിയോ ജോബ്, വൈസ് പ്രസിഡണ്ട് മാരായ പി.ജെ. ജെയിംസ് എറണാകുളം, കെ. മോഹനൻ കുമാർ, സി.വി. ജോസി എന്നിവർ പങ്കെടുത്തു. ജനറൽ സെക്രട്ടറി സി.സി. മനോജ് സ്വാഗതവും, ഖജാൻജി സി.എൻ. രാധാകൃഷ്ണൻ നന്ദിയും രേഖപ്പെടുത്തി.
