ഇത് പാടമല്ല… ചിറയാണ്;
നെടു ചിറ സംരക്ഷിക്കണമെന്ന ആവശ്യം ശക്തം
കോലഞ്ചേരി: മഴുവന്നൂർ പഞ്ചായത്തിലെ പതിനഞ്ചാം വാർഡിൽ സ്ഥിതി ചെയ്യുന്ന നെടു ചിറ നാശത്തിന്റെ പിടിയിലാണ്. സൗത്ത് മഴുവന്നൂരിനടുത്ത് ഒരേക്കർ വിസ്തൃതിയിലുള്ള നെടു ചിറയാണ് ആർക്കും വേണ്ടാതെ ഉപയോഗശൂന്യമായി കിടക്കുന്നത്. മരണാസന്നമായി കിടക്കുന്ന ഈ ചിറയെ സംരക്ഷിക്കണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ടെങ്കിലും അത് നേടിയെടുക്കുന്നതിന് ഇത് വരെ സാധിച്ചിട്ടില്ല.നിലവിൽ നിരവധി മാലിന്യങ്ങൾ കൊണ്ട് സാമൂഹ്യ വിരുദ്ധർ ഈ ചിറ ദുരുപയോഗപ്പെടുത്തിയിരിക്കുകയാണ്. ചിറക്ക് സംരക്ഷണഭിത്തികെട്ടി ചുറ്റും നടപ്പാതകൾ തീർത്ത് പുല്ലും, പായലും , മാലിന്യങ്ങളും നീക്കം ചെയ്ത് വൃത്തിയാക്കി മികച്ച ജല സ്രോതസ്സിന്റെ ഉറവിടമായ നെടു ചിറയെ സംരക്ഷിച്ച് കൊണ്ടുവരണമെന്നാണ് നാട്ടുകാരുടെ കൂട്ടായ ആവശ്യം.ഇത് നടപ്പിലാക്കിയാൽ നീന്തൽ പഠനത്തിനും, വേനൽക്കാലത്ത് പഞ്ചായത്ത് പ്രദേശത്തെ കുടിവെള്ള വിതരണത്തിനും ചിറയെ ഉപയോഗപ്പെടുത്താനാകുമെന്നതാണ് പ്രധാന വസ്തുത.
