മല്ലിയില വീട്ടിൽ കൃഷി ചെയ്യാം

പല തരം കറികൾക്കും അത്യാവശ്യമായ ഒരു ഇല ആണ് മല്ലിഇല. അതിന്റെ ഇല പോലെ വേരിനും നല്ല മണമാണ്. എന്നിട്ടും വളരെ കുറച്ചു ആളുകൾ മാത്രമേ ഇതുവളർത്തുന്നുള്ളു. ഇതുവളർത്താൻ ബുദ്ധിമുട്ടാണെന്ന് വിചാരിച്ചിട്ടാണോ അതോ മെനക്കെടാൻ വയ്യെന്ന് വിചാരിച്ചിട്ടാണോ എന്ത്‌കൊണ്ടെന്നു അറിയില്ല. ഈ ചെടി കുറച്ചു ഡെലിക്കേറ്റ് ആണെന്നത് ശരി. മാർക്കറ്റിൽ കിട്ടുന്ന ഇല പല തരം രാസ-വിഷ പ്രയോഗം കഴിഞ്ഞതാണ് എന്നറിഞ്ഞിട്ടും പലരും ഇതു വീട്ടിൽ വളര്ത്താൻ ശ്രമിക്കുന്നില്ല എന്നത് അതിശയംതന്നെ. വീട്ടിൽവളരത്താൻ വലിയ ബുദ്ധിമുട്ടില്ലാത്ത ഒന്നാണ് മല്ലി. വിത്തു നേരിട്ട് പാകാം. നമ്മുടെ കാലാവസ്ഥയിൽ ഇതുവർഷം മുഴുവൻ വളർത്താൻ പറ്റിയതാണ്.

കൃഷി ചെയ്യേണ്ട രീതി

ആദ്യമായി നടാൻ പറ്റിയ സ്ഥലം കണ്ടെത്തുക. കുറേശ്ശെ സൂര്യപ്രകാശം കിട്ടുന്ന സ്ഥലം ആയിരിക്കണം. നട്ടുച്ചയ്ക്ക് നേരിട്ടുള്ള സൂര്യപ്രാകാശം വീഴുന്ന സ്ഥലം ഒഴിവാക്കുക. മല്ലിചെടിക്കു വേണ്ടത് ഇളം ചൂടുള്ള സൂര്യ പ്രകാശം ആണ്. അപ്പോൾ രാവിലെയും വൈകുന്നേരവും മാത്രം വെയിൽ കിട്ടുന്ന സ്ഥലം തിരഞ്ഞെടുക്കുന്നതാവും നല്ലത്.
നല്ല നീർവാഴ്ചയുള്ള സ്ഥലമായിരിക്കണം. മണ്ണു നന്നായി കിളച്ചു അതിലെ കല്ലും മറ്റു പാഴ് വസ്തുക്കളും നീക്കം ചെയ്യുക. മണ്ണിൽ പച്ചിലകളും ജൈവകമ്പോസ്റ്റും അടിവളമായി ഇടുക. മുമ്പ് രാസവളം ഉപയോഗിച്ച മണ്ണ് ആണെങ്കിൽ കുറച്ചു കുമ്മായം ഇടുക.
ചട്ടിയിലാണെങ്കിൽ, മല്ലി ആണിവേര് ഉള്ള ചെടിയായതുകൊണ്ട് (കാരറ്റിൻറെ കുടുംബത്തിൽ പെട്ടത്) എട്ടോ പത്തോ ഇഞ്ചു ആഴമുള്ള ചട്ടി വേണം. പിരിച്ചു നടാൻ പറ്റിയ ഇനമല്ലാത്തത് കൊണ്ട് വിത്തിടുന്നതിനു മുമ്പ് തന്നെ ശരിയായ അടിവളം ചേർത്തിരിക്കണം. മേല്മണ്ണു, മണൽ, ചകിരിചോറു, മണ്ണിരകമ്പോസ്റ്റ്, ചാണകപൊടി, പച്ചിലകൾ എന്നിവകൂട്ടിയ മിശ്രിതമാണ് നല്ലത്.

വിത്തിടൽ

മല്ലി വിത്ത് കണ്ടിട്ടില്ലേ? ഒരു തോടിൽ രണ്ടു വിത്തുകൾ ഒട്ടിപിടിച്ചു ഒരു ഉരുണ്ട പന്ത് പോലെ ഇരിക്കും. അതിൻറെ തോടു കുറച്ചു കട്ടി കൂടിയതാണ്. അത്‌കൊണ്ട് അത് ഒരു പേപ്പറിൽ ഇട്ടു ഒരു ഉരുളൻ വടി കൊണ്ട് (ചപ്പാത്തിക്കോൽ) മേലെ ഉരുട്ടിയാൽ ഓരോ വിത്തും രണ്ടു വിത്തായി വേർപെടും. വിത്ത് മുളക്കുന്നതിനു ധാരാളം ഈർപ്പം വേണം. മുളക്കാൻ രണ്ടാഴ്ച മുതൽ നാലാഴ്ച വരെ സമയമെടുക്കും. വിത്ത് ഒന്നോ രണ്ടോ ദിവസം കുതിർത്ത ശേഷം നടുന്നതാണ് നല്ലത്. വിത്ത് കട്ടൻചായ വെള്ളതിൽ ഇട്ടുവെച്ചാൽ ചായയിലെ ടാനിൻ അതിൻറെ തോടിനെ മൃദുവാക്കും എന്നത് കൊണ്ട് വേഗത്തിൽ മുളക്കും.

വിത്തിടുന്നതിനു രണ്ടു രീതിയുണ്ട്.

മണ്ണിൽ കാൽ ഇഞ്ചു താഴെ, നാലിഞ്ചു മുതൽ ആറിഞ്ചു അകലത്തിൽ വരിയായി നടാം. വരികൾ തമ്മിൽ അര അടി അകലം വേണം. അല്ലെങ്കിൽ വിത്ത് മണ്ണിൻറെ മുകളിൽ ഒരേ തരത്തിൽ പരക്കുന്ന രീതിയിൽ വിതറാം. വിത്തിന് മുകളിൽ കാൽ ഇഞ്ചു കനത്തിൽ ചകിരി ചോറോ നനുത്ത മണ്ണോ കൊണ്ട് മൂടണം. വെള്ളം സ്‌പ്രേ ചെയ്യണം. നനക്കുമ്പോൾ വളരെ ശ്രദ്ധിക്കണം. വെള്ളം കുത്തി ഒഴിച്ചാൽ വിത്ത് അവിടവിടെ ആയി പോകും.
ഈ ചെടിക്ക് മൂന്നോ നാലോ മാസം മാത്രം ആയുസ്സുള്ളതുകൊണ്ട് വിത്തിടുമ്പോൾ പല ബാച്ചുകളായി രണ്ടു മൂന്നു സ്ഥലത്ത് രണ്ടു മൂന്നു ആഴ്ച ഇടവിട്ടു നട്ടാൽ എല്ലായ്‌പ്പോഴും ഇല കിട്ടും.

വളം കൊടുക്കൽ

മുളച്ചു രണ്ടിഞ്ചു ഉയരം വന്നാൽ വളം കൊടുക്കാൻ തുടങ്ങാം. വെള്ളത്തിൽ അലിയുന്ന നൈട്രജെൻ വളങ്ങളാണ് നല്ലത്. വളം ഒരിക്കലും അധികമാകരുത്, അധികമായാൽ ഇലയുടെ മണം കുറയും. നേർപ്പിച്ച ചാണക വെള്ളം മാത്രം ഒഴിച്ചാലും മതി. ഏറ്റവും നല്ലത് ഫിഷ് അമിനോ ആസിഡ് ആണ്. അതൊരിക്കൽ മാത്രമേ കൊടുക്കാവൂ. കട്ടി കൂടിയ മിശ്രിതങ്ങൾ ഒഴിവാക്കുക. നെമവിര ശല്യം ഒഴിവാക്കാനാണിത്. ചെടി കുറച്ചു വലുതായാൽ പിന്നെ നനക്കുന്നത് കുറക്കണം. രാവില ചെറുതായി നനച്ചാൽ വൈകുന്നേരത്തേക്ക് കട ഉണങ്ങിയിരിക്കണം. ഒരിക്കലും വെള്ളം കെട്ടി നിൽക്കരുത്.

ചെടികൾ കൂട്ടംകൂടി വളർന്നാൽ നന്നല്ല. അതുകൊണ്ട് ഇടക്കുള്ള ഉയരം കുറഞ്ഞ ചെടികൾ പറിച്ചെടുത്തു കറിക്ക് ഉപയോഗിക്കാം. ചെടികൾക്കിടയിൽ 8 ഇഞ്ചു ഇടം വരുന്ന രീതിയിൽ ബാക്കിയുള്ളവയെ പറിച്ചെടുക്കുക. ഇടയിൽ കള വളരാൻ ഇട വരരുത്. കള വളരെ ചെറുതായിരിക്കുമ്പോൾ തന്നെ പറിച്ചു കളയുക. ചട്ടിയിലെ പോഷകം തിന്നു വളർന്ന ശേഷം ആ കളയെ പറിച്ചു കളഞ്ഞിട്ടെന്തു കാര്യം?

വിളവെടുപ്പ്

ചെടി നാലോ ആറോ ഇഞ്ചു ഉയരം വെച്ചാൽ അടിഭാഗത്തുള്ള ഇലകളോ ചെറിയ ചില്ലകളോ നുള്ളി എടുക്കാം. ഇല നുള്ളിയാൽ മാത്രമേ അത് വേഗം വളരൂ എന്ന് ഓർമിക്കുക. മൂന്നിൽ രണ്ടു ഭാഗം ഇലകളിൽ കൂടുതൽ ഒരേ സമയം നുള്ളരുത്, അത് ചെടിയ്ക്ക് ക്ഷീണമാകും. ഒരിയ്ക്കൽ ഇല നുള്ളിയാൽ ചെടി വീണ്ടും കിളിർക്കാൻ തുടങ്ങും. രണ്ടു മൂന്നു ആഴ്ച കൂടുമ്പോൾ ഇങ്ങനെ ഇല നുള്ളാം. പിന്നീട് ചെടി പൂവിടാൻ തുടങ്ങും. അപ്പോൾ പുതിയ ഇലകൾ വരുന്നത് നില്ക്കും . തുടർന്നും ഇല വേണമെങ്കിൽ ഉണ്ടാകുന്ന പൂക്കളെ അപ്പപ്പോൾ കളയണം. നമുക്ക് ഇല വേണോ അതോ അതിനെ പൂവിടാൻ വിടണോ എന്ന് തീരുമാനിക്കുക. പൂ ഉണങ്ങിയാൽ കൊത്തംബാല കിട്ടും. അത് പറിക്കാതെ ചെടിയിൽ തന്നെ നിർത്തിയയാൽ ഉണങ്ങി താഴെ വീണു പുതിയ ചെടികൾ മുളച്ചു വരാൻ തുടങ്ങും. ചെടി രണ്ടടിവരെ ഉയരം വെയ്ക്കും.

ഇലയുടെ തീക്ഷ്ണമായ മണം കാരണം കീട ശല്യം ഇതിനു കുറവാണ്. എങ്കിലും ഈർപ്പം അധികം ആയാൽ കുമിൾ ബാധ വരും. വെളുത്ത പൊടി പോലെ ഇലകളിൽ നിറയും. കുമിൾ ബാധ വരാതിരിക്കാൻ നല്ല വായു സഞ്ചാരം ഉണ്ടായിരിക്കണം. ബാധ വന്ന ഇലകൾ അപ്പപ്പോൾ നുള്ളി കളയുക. ചെടിയുടെ കടക്കൽ എപ്പോഴും വൃത്തിയായി വെയ്ക്കണം. അവിടെ ചീഞ്ഞ ഇലകളോ പൂക്കളോ ഉണ്ടെങ്കിൽ കുമിൾ ബാധ വരാൻ സാധ്യതയുണ്ട്. മല്ലി ഇലയുടെ നീര് അസിഡിറ്റി കുറയ്ക്കും. ശരീരത്തിന് തണുപ്പ് കൊടുക്കും. ഛർദ്ദിക്ക് ഒന്നോ രണ്ടോ ഇല വായിലിട്ടു ചവച്ചു നീരിറക്കിയാൽ മതി. സുഗന്ധ ദ്രവ്യം എന്ന നിലയിൽ കറികളിൽ ചേര്ക്കാം. ഇതു ദഹനത്തെയും സഹായിക്കും.

സാധാരണ മല്ലി പാകിയാൽ മതി. ചപ്പാത്തി കുഴൽ കൊണ്ട് അല്ലെങ്കിൽ അത് പോലെ ഉള്ള എന്തേലും വസ്തു കൊണ്ട് മല്ലി വിത്ത് മൃദുവായി പൊട്ടിച്ച ശേഷം പാകാവുന്നതാണ്. വളരെ വേഗം മുളയ്ക്കുന്ന ഒരു വിത്താണ്. മാറ്റി നട്ടാൽ വളരാൻ ബുദ്ധിമുട്ടാണ് അത് കൊണ്ട് വളരേണ്ട സ്ഥലത്ത് തന്നെ നേരിട്ടാണ് സാധാരണ വിത്ത് നടുന്നത്. നല്ല വളർച്ച കിട്ടാൻ ചെടികൾ തമ്മിൽ 5 സെന്റീമീറ്റർ അകലം വേണം. അത് കൊണ്ട് മുളച്ചു അഞ്ചാറ് ഇല ആകുമ്പോൾ ഇടയ്ക്കു നിന്ന് തൈകൾ പറിച്ചു മാറ്റി ഉപയോഗിക്കാം. ബാക്കി ഉള്ളവ നന്നായ് വളരും. രണ്ടു ആഴ്ച കൊണ്ട് ഉപയോഗിക്കാൻ പറ്റും. പൂത്തു തുടങ്ങിയാൽ പൂവ് നുള്ളി കളയണം. ഒരെണ്ണം പൂത്താൽ കൂട്ടത്തിൽ ഉള്ള മുഴുവൻ ചെടികളും പൂക്കും. വിത്ത് ശേഖരണം വേണമെങ്കിൽ കുറച്ചു വിത്ത് വേറെ ചട്ടിയിൽ നട്ട് പൂക്കാൻ അനുവദിക്കണം.ചാണകം കലക്കി ഒഴിക്കുന്നത് വളർച്ചക്ക് ഉത്തമം